Þriðjudagskvöldin eru golfkvöld á Stöð 2 Sport í sumar. Sýnt verður frá öllum mótunum í Eimskipsmótaröðinni auk þess sem Logi Bergmann og Þorsteinn Hallgrímsson stýra nýjum og skemmtilegum golfþætti sem kallast Tvöfaldur skolli. Einnig verða sýndir tveir þættir um eitt fjörugasta golfmót sumarsins, Herminator-Invitational, sem knattspyrnukappinn Hermann Hreiðarsson stendur fyrir árlega í Vestmannaeyjum.

Í sumar verður bein útsending frá hápunkti golfsumarsins, Íslandsmótinu í höggleik, sem fram fer á Hellu helgina 28. – 29. júlí. Þá verða einnig sérstakir þættir um Einvígið á Nesinu þar sem bestu kyflingar landsins taka þátt í golfmóti með skemmtilegu fyrirkomulagi og einnig þáttur frá Unglingaeinvíginu í Mosfellsbæ þar sem efnilegustu kylfingar landsins taka þátt í samskonar móti.

Af erlendu golfi verður sýnt beint frá stórmóti í Þýskalandi helgina 28. – 29. Júlí sem kallast Schuco Open en þar er útvöldum kylfingum boðið til leiks og meðal keppenda eru: Bubba Watson (sem sigraði á The Masters), Martin Kaymer, Dustin Johnson, Miguel Ángel Jiménez, Ian Poulter, Edoardo Molinari, Geoff Ogilvy, Peter Hanson, Henrik Stenson og Colin Montgomerie.