Wipeout-æðið hófst á Íslandi eftir geysivel heppnaða íslenska þáttaröð sem sló rækilega í gegn .

Föstudagar hafa líka verið fráteknir hjá fjölskyldum landsins fyrir rækileg Wipeout-partí og gamanið heldur áfram með bandarísku útgáfunni, þeirri sömu og varð kveikjan að æðinu mikla fyrir liðlega ári síðan.

Það þarf ekki að fara mörgum orðum um þáttinn. Hann er með sama sniði og sá íslenski nema að nú hefur verið bætt við erfiðari þrautum en nokkru sinni. Stálheppnir en fífldjarfir keppendur taka þátt í þrautabrautinni skemmtilegu í Argentínu og keppa í hverjum þætti til síðasta manns – eða konu.

Grínið og gamanið hefur aldrei verið meira, buslugangurinn gjörsamlega botnlaus og glíman við rauðu boltana hefur aldrei verið fyndnari.